2 Kings 8

Indaba yowesifazana weShunemi

1UElisha wasekhuluma kowesifazana ondodana yakhe ayeyenze yaphila ^a, esithi: Sukuma, uhambe wena lendlu yakho, uyehlala njengowezizwe lapho ongahlala khona njengowezizwe, ngoba iNkosi ibize indlala, ezafika njalo elizweni iminyaka eyisikhombisa ^b. 2Owesifazana wasukuma-ke, wenza njengokutsho komuntu kaNkulunkulu; wahamba yena lendlu yakhe, wahlala njengowezizwe elizweni lamaFilisti iminyaka eyisikhombisa. 3Kwasekusithi ekupheleni kweminyaka eyisikhombisa, owesifazana waphenduka evela elizweni lamaFilisti; waphuma ukuyakhala enkosini ngendlu yakhe langensimu yakhe. 4Inkosi yayikhuluma-ke loGehazi inceku yomuntu kaNkulunkulu ^c isithi: Akungilandisele izinto zonke ezinkulu uElisha asezenzile. 5Kwasekusithi esatshela inkosi ukuthi wavusa njani ofileyo ^d, khangela-ke, owesifazana ondodana yakhe ayeyivuse ekufeni wakhala enkosini ngendlu yakhe langensimu yakhe. UGehazi wasesithi: Nkosi yami, nkosi, nguye lo owesifazana, njalo yiyo le indodana yakhe uElisha ayiphilisayo. 6Lapho inkosi ibuza owesifazana, wayilandisela. Inkosi yasimmisela induna ethile, isithi: Buyisela konke okwakungokwakhe, laso sonke isivuno sensimu kusukela mhla esuka elizweni kuze kube lamuhla.

UHazayeli uba yinkosi yeSiriya

7UElisha wasefika eDamaseko ^e, njalo uBenihadadi inkosi yeSiriya wayegula ^f. Wasetshelwa kwathiwa: Umuntu kaNkulunkulu ufikile lapha. 8Inkosi yasisithi kuHazayeli ^g: Thatha esandleni sakho isipho, uyehlangabeza umuntu kaNkulunkulu ^h, ubusubuza eNkosini ngaye usithi: Ngizasila yini kulumkhuhlane? 9UHazayeli wasesiyamhlangabeza, wathatha isipho esandleni sakhe, ngitsho esakho konke okuhle kweDamaseko, imithwalo yamakamela engamatshumi amane, weza wema phambi kwakhe, wathi: Indodana yakho uBenihadadi inkosi yeSiriya ingithumile kuwe isithi: Ngizasila yini kulumkhuhlane ⁱ? 10UElisha wasesithi kuye: Hamba uthi kuye: Ungasila lokusila, kodwa iNkosi ingibonisile ukuthi uzakufa lokufa ^j. 11Wasemjolozela waze waba lenhloni. Umuntu kaNkulunkulu waselila ^k. 12UHazayeli wasesithi: Inkosi yami ililelani? Wasesithi: Ngoba ngiyazi ububi ozabenza ebantwaneni bakoIsrayeli; uzathungela inqaba zabo ngomlilo, ubulale amajaha abo ngenkemba ^l, uphahlaze abantwanyana babo ^m, uqhaqhe abesifazana babo abakhulelweyo ⁿ. 13Kodwa uHazayeli wathi: Kodwa iyini inceku yakho eyinja nje, ukuthi yenze linto enkulu ^o? UElisha wasesithi: INkosi ingibonisile ukuthi uzakuba yinkosi phezu kweSiriya ^p. 14Wasesuka kuElisha weza enkosini yakhe eyathi kuye: UElisha utheni kuwe? Wasesithi: Ungitshele ukuthi uzasila lokusila ^q. 15Kwasekusithi kusisa wathatha ingubo, wayigxamuza emanzini, wayendlala phezu kobuso bakhe waze wafa. UHazayeli wasesiba yinkosi esikhundleni sakhe.

Ukubusa kukaJoramu koJuda

16Njalo ngomnyaka wesihlanu kaJoramu indodana kaAhabi inkosi yakoIsrayeli ^r, lapho uJehoshafathi eyinkosi yakoJuda, uJehoramu indodana kaJehoshafathi inkosi yakoJuda waba yinkosi ^s. 17Wayeleminyaka engamatshumi amathathu lambili lapho esiba yinkosi, wabusa iminyaka eyisificaminwembili eJerusalema ^t. 18Wasehamba ezindleleni zamakhosi akoIsrayeli njengokwenza kwendlu kaAhabi, ngoba indodakazi kaAhabi yayingumkakhe; wenza okubi emehlweni eNkosi ^u. 19Kodwa iNkosi kayithandanga ukuchitha uJuda ngenxa kaDavida inceku yayo, njengokuthembisa kwayo kuye ukuthi izanika isibane kuye zonke izinsuku ^v, lemadodaneni akhe ^w.

20Ensukwini zakhe iEdoma yahlamuka isuka phansi kwesandla sakoJuda, yabeka inkosi phezu kwayo ^x. 21UJoramu wasewelela eZayiri lazo zonke inqola zilaye; yena wavuka ebusuku watshaya amaEdoma ayemzingelezele, lenduna zezinqola; labantu babalekela emathenteni abo ^y. 22Ngakho iEdoma yahlamuka isuka phansi kwesandla sakoJuda kuze kube lamuhla. Khona iLibhina yahlamuka ngalesosikhathi ^z.

23Ezinye-ke zezindaba zikaJoramu, lakho konke akwenzayo, kakubhalwanga yini egwalweni lwemilando yamakhosi akoJuda? 24UJoramu waselala laboyise, wangcwatshelwa kuboyise emzini kaDavida ^aa. UAhaziya indodana yakhe wasesiba yinkosi esikhundleni sakhe ^ab.

Ukubusa kukaAhaziya koJuda

25Ngomnyaka wetshumi lambili kaJoramu indodana kaAhabi inkosi yakoIsrayeli uAhaziya indodana kaJehoramu, inkosi yakoJuda, waba yinkosi ^ac. 26UAhaziya wayeleminyaka engamatshumi amabili lambili lapho esiba yinkosi, wabusa umnyaka owodwa eJerusalema. Lebizo likanina lalinguAthaliya, indodakazi kaOmri inkosi yakoIsrayeli ^ad. 27Wasehamba ngendlela yendlu kaAhabi, wenza okubi emehlweni eNkosi, njengendlu kaAhabi, ngoba wayengumkhwenyana wendlu kaAhabi ^ae.

28Wasehamba loJoramu indodana kaAhabi ukulwa loHazayeli inkosi yeSiriya ^af eRamothi-Gileyadi ^ag; amaSiriya aselimaza uJoramu. 29UJoramu inkosi wabuyela ukwelatshwa ^ah eJizereyeli amanxeba amaSiriya ayemtshaye wona ^ai eRama ekulweni kwakhe loHazayeli inkosi yeSiriya. UAhaziya indodana kaJehoramu inkosi yakoJuda wasesehla ukubona uJoramu indodana kaAhabi eJizereyeli, ngoba wayegula ^aj.